走過N班的路：Interview前要做咩？ （早期篇）

講到去學校Interview前要做啲咩，博到盡又有支援的話，唔洗煩直接安排面試班+面試班啦~ 但作為中庸母親嘅我，當然以能力範圍之內為大前題去準備。

早期（面試前三個月或愈早愈好）

學習自己名字、打招呼

其實唔Interview 都需要做好呢件事，偏偏時間就到，好多媽媽先話小朋友未識、未會……當然，能力發展有異可能係因素之一。不過相信早期就開始教，潛移物化、有樣學樣，總有啲成效。當時同朝瞳坐車、行路、沖涼，一得閒就同佢講「我叫xxx，兩歲，最鍾意食雞蛋。」有進步就再教多啲「我媽媽叫xxx、我爸爸叫xxx」，或者一問一答。

打探面試方式

學校面試通常有幾個形式，一大班小朋友圍坐玩玩具從中觀察，與父母一齊見老師做指令，單對單見老師做指令(好少)，及早打探下心儀學校形式係點、大概做咩類型嘅指令，心裡面有個打算可以練習一下~

寓練習於遊戲

有爸爸媽媽知道學校要求做某啲指令、遊戲，已經話「咁難點做呀!」 。其實及早培養習慣、同小朋友玩開就唔難，所以係視乎幾時開始、你點同小朋友玩。每日有固定嘅親子遊戲時間，策略性選擇玩具就已經係好開始。一歲半嘅朝瞳通常會玩玩積木、串珠、Lego（單件折開再砌番）、認動物、認日常物件。開始係難嘅，坐唔定、唔聽講係必經，但持之以恆一定有進步。

睇到呢度，你心裡可能OS「你做咁多野仲唔大壓力！？」。同小朋友對答、玩玩具係日常生日一部份，適當安排就唔會覺得係一份苦差。睇住小朋友從零到學會，一定會有收穫大過壓力。

圖文 / 朝瞳氏の日常；編輯 / 媽咪愛

感謝朝瞳氏の日常，文章出處：走過N班的路: Interview前要做咩? (早期篇)