走過N班的路：Interview前要做咩？（後期篇）

機會係畀有準備嘅人。大人見工都會prepare定，仔女見學校做好準備其實都好應該。 

後期（進入面試月份9-11月）

父母準備面試台詞

洗唔洗咁誇張? 但! 我覺得寫低係十分重要。家長面談總有幾條熱門問題：「小朋友係邊個湊?生活習慣係點？」、「點解你揀我地學校？」、「小朋友係屋企通常玩咩？」，當時我認認真真係一程由新界去港島嘅車程，用手機打好晒答案。

準備面試答案好處：

1．心底有model answer，唔怕到時dead air

2．搵出重點（即場先諗答案，可能講一大輪野先入到重點，老師有耐性，呀仔都可能走左去）

3．畀老豆溫習（十分緊要，唔好以為兩公婆講句心照就算，重要場合夾定好啲）

4．N次用（每次臨去前望一次，唔好畀呀囝呀囡打亂陣腳）

係屋企扮面試

呢一個準備最好玩，搵兩張小椅子、小檯模擬係學校玩，畀佢感受下。記得當時爸爸扮老師，我同朝瞳一齊坐，老師問：「你叫咩名？」我就舉手答，結果朝瞳淨係哈哈大笑。

準備Game bag 

「等」，對小朋友同爸爸媽媽都係大挑戰。帶喜歡嘅小玩意，例如貼紙遊戲書、故書事、小車仔、紙筆等等，係坐唔定時拎出嚟玩，希望拖得就拖。可以的話拎多2-3樣傍身、因為你唔知佢心情想玩邊樣。另外，準備終極法寶 「餅或糖」，相信都唔洗解釋，哈哈！ （但係學校內未必畀進食，所以家長要留意。）

前一日同孩子預告、當日提早少少去

係面試日子前幾日，同小朋友預告：「我哋星期六會去xx學校玩呀！果度有玩具啦、又有老師同我地傾計，媽媽同你一齊去，一定好好玩!」。而當日提早少少去，除左避免交通同突發事件等等，亦可以畀小朋友熟習。

回想起第一次帶朝瞳去Interview，都幾緊張~ 一大早著得整整齊齊，準備一大袋行裝出發。到第三、四次開始習慣模式，朝瞳又主動咗，其實緊張都係多餘。無論大人或小朋友，做好準備自然對自己有信心、保持開心、時時笑，校長、老師見到印象都深啲! 經驗可以參考，但面試教學絕無一本通書睇到老，自己同小朋友互相配合最重要! 大家加油~

圖文 / 朝瞳氏の日常；編輯 / 媽咪愛

感謝朝瞳氏の日常，文章出處：走過N班的路: Interview前要做咩? (後期篇)