走過N班的路: 報名前要做咩?

記得2016年嘅5、6月都真係幾煩惱，新手呀媽對報學校幾乎係0知識，唯有不斷上網爬文，到今日總算走過咗，可以有少少心得同大家分享。

了解學校、Mark定心水

去淘寶買嘢都會睇Review，報學校咁重要上forum睇、係group打聽都正常不過。但無論點收風，最重要都係去學校親自睇下~盡量留意學校嘅網站（當時我真係每隔一星期就逐個去睇下有冇活動或更新），趁Open Day親身去行一行，望下環境、感受一下。

學校有直屬同非直屬嘅 Playgroup 報唔報好?

呢個問題一定「老是常出現」，應該無人可以答實你係咪報左就一定收，可能只有一個人會知（校長大人）。但過往經驗話我知，參加學校嘅Playgroup可以趁機會走入學校了解作風、老師教學方式、亦畀小朋友熟悉環境。朝瞳曾經報過幾間學校辦嘅Playgroup，親身體驗過覺得有啲學校與評論中有出入，最後未被取錄都唔覺失望。

報幾多間好?

「報多啲好，面試好多時靠彩數！」、「報咁多，撞晒咪又係IN唔到，唔報啦~」，報幾多都係視乎父母心態，若果係非讀書不可、想「我揀人」，當然會大包圍。但唔想咁大壓力，五至六間已算係中庸之道，高中低難度都有就更合理。若只報一、兩間，可能突發有事、當日表現失常，就大大減低機會。

將心水排位?

嘗試將心儀名單排個次序，「神級好想入」、「中規中矩」、「近屋企易入」，等自己易啲分析、易啲下決定。

父母多聽多睇不同學校嘅資料係好事，但心底裡一定、一定要為自己、為囝囡下底線，例如太遠、開支太大、人手不足為大前題，原本定好計劃但又聽到口碑好，即使長途跋涉都要去，就未免本末倒置。

圖文 / 朝瞳氏の日常；編輯 / 媽咪愛

感謝朝瞳氏の日常，文章出處：走過N班的路: 報名前要做咩?